O III Encontro Ibérico de Turismo Fluvial Transfronteirizo, celebrado o 29 e 30 de setembro na Sala de Plenos do Concello da Guarda, incluía no seu programa varias saídas náuticas a bordo do Xacobeo Transfer, unha embarcación híbrida con base en Camposancos. A sesión de boas prácticas ía rematar cunha saída demostrativa, e durante os dous días estaban previstas saídas abertas a todas as persoas participantes.

O mal tempo obrigou a anular moitas desas saídas. Por iso, desde AGAN+ quixemos ofrecer unha segunda oportunidade para que ninguén quedase sen coñecer de primeira man a experiencia de navegar pola Foz do Miño nunha embarcación sostible.

Dúas xornadas de navegación

Os días 14 e 15 de outubro, o Pantalán da Pasaxe, en Camposancos, foi o punto de partida de saídas de 25 minutos, en grupos reducidos de ata 10 persoas. As quendas saían cada media hora.

En total ofertáronse 150 prazas. Nelas participaron persoas da Asociación San Xerome Emiliani, da Asociación Avelaíña Baixo Miño e veciñanza do Baixo Miño e do Val Miñor.

Turismo fluvial para todas as persoas

Estas xornadas demostran que o turismo fluvial é unha ferramenta para achegar o río á cidadanía, e non só un produto para visitantes. A participación de entidades sociais e da veciñanza da contorna confirma o interese por coñecer o Miño desde outra perspectiva: en silencio, sen emisións e coa paisaxe da desembocadura como protagonista.

Grazas a todas as persoas e entidades que se animaron a embarcar, e á tripulación do Xacobeo Transfer por facelo posible. Seguimos traballando para que a navegación sostible sexa unha parte cada vez máis presente do turismo nos nosos ríos.

O III Encontro Ibérico de Turismo Fluvial Transfronteirizo está organizado por AGAN+, Red CIFT e Red CCF, co patrocinio da Deputación de Pontevedra e a colaboración do Concello de A Guarda.